“Бала қауіпсіздігі басты орында”

Жоспарға сәйкес ұйымдастырылған «Бала қауіпсіздігі басты орында» іс-шарасы аясында «Жұлдыз» ересек тобының балалары орталық алаңда өткен өрт сөндіру техникасының көрмесіне экскурсияға барды. Таңертеңнен бастап балалар ерекше көңіл күйде болды, себебі оларды нағыз өрт сөндіру машиналарын көру және батыр өрт сөндірушілермен жүздесу күтіп тұрды.

Алаңда балаларды жылы жүзді өрт сөндіру қызметкерлері қарсы алды. Олар өз мамандықтары туралы айтып беріп, арнайы киімдерін, каскаларын және өрт сөндіру мен құтқару жұмыстарына арналған құрал-жабдықтарын көрсетті. Балалар үлкен қызығушылықпен тыңдап, сұрақтар қойып, техниканы мұқият қарап шықты.

Ең әсерлі сәт — балалардың өрт сөндіру көлігінің ішіне кіріп көру мүмкіндігі болды. Олар өрт сөндірушілердің қайда отыратынын көріп, көліктің ішкі құрылысымен танысты.

Алғыстың белгісі ретінде балалар өрт сөндірушілерге өрт қауіпсіздігі тақырыбында жарқын түсті плакат дайындап, тарту етті. Плакат балалардың өз қолдарымен салған суреттерімен және қауіпсіздік ережелерін еске салатын ұрандармен безендірілді. Өрт сөндірушілер балалардың ықыласына ризашылықтарын білдіріп, осындай жылы сыйлық үшін алғыс айтты.

Экскурсия өте мазмұнды әрі есте қаларлықтай болды. Балалар өрт қауіпсіздік ережелерін сақтау қаншалықты маңызды екенін және өрт сөндірушілердің еңбегі ауыр әрі аса құрметке лайық екенін түсінді. Барлығы көтеріңкі көңіл-күймен оралып, алған әсерлерімен бөлісті. Бұл күн біздің есімізде ұзақ сақталары сөзсіз!